نصيحة بنت لاصدقائها فى عيد الحب

للبنات كيف تقضين عيد الحب بدون حبيب

--------------------------------------------------------------------------------

"حب إيه اللي إنت جاي تقول عليه؟ إنت عارف قبله معنى الحب إيه؟ حب آه.. حب أوه" على هذه النغمة الرائعة للمطرب والممثل العاطفي "محمد سعد" -مع الاعتذار لثومة- سأبدا "الفالنتاين داي" بالعربي "عيد الشحططة والبهدلة، واللي ليه شوق إنه يعترض يقول، والميدان واسع وفارس لفارس..

أنا مش معقدة ولا حاجة، بس واحدة مسكينة زيي مش لاقية حد يعبرها في عيد الحب، ممكن تتصرف ازاي.. هل تضع بجوارها الوسادة الخالية، ولاّ تقعد في بيتهم تقزقز لب.. ده إنتم ماتعرفوش احنا ممكن نعمل إيه يا بنات.. إذا كنتم فاكرين إن الوضع ده يتسكت عليه فمعلش أنا هاعترض وعندي طريقتي اللي هاقضي بيها أحلى عيد حب..

بدل الورد اللي بتطلعوا بيه على القرافة:

قال إيه تلاقي "عبد المعطي وبهانة" شايلين حزمة ورد قد كده وكأنهم طالعين أول طلعة على ميت طازة وأنا أبقى قاعدة باغلي وبافور إن مافيش حد معبرني بحزمة جرجير.. طيب في الحالة دي ممكن نعمل إيه؟ "بدل الورد اللي بيطلعوا بيه على القرافة، ناوية أجيب كيلو ولا اتنين جوافة"، وإن مالقيناش جوافة ممكن نجيب موز ونقشر ونرمي القشر قدام أي اتنين معديين ولا بلاش نرميه قدام الاتنين.. حرام.. "نرمية قدام الولد بس".

شيكولاتة:

مهم جدا في عيد الحب إن يبقى فيه شيكولاتة مش كده؟ بس في الغالب برضه ماحدش هيعبرنا ويجيب لينا شيكولاتة، لذلك فأمامنا عدة حلول أولها: إننا نروح نجيب كيلو شيكولاتة ونعيش حياتنا..
ثانيا: لازم تقولوا لكل اللي هيحتفلوا بعيد الحب إن الشيكولاتة فيها سم قاتل وإنها تؤدي إلى مغص بالمعدة وتقيؤ وغثيان وممكن تقولوا إنها بتسبب أنفلونزا الطيور.. وفي كل الحالات على رأي "سعاد حسني" الشيكولاتة هتلاقيها ساحت راحت مطرح ما راحت.

حبيبك:

قال على رأي المثل "حبيبك من تحب ولو كان دب" لذلك أقترح عليكم تقضية عيد الحب في جمعية الرفق بالحيوان وتبقوا على الأقل عملتم حاجة مفيدة في حياتكم وبلاش شغل السنكحة على ابن خالتك ولا على ابن عمك باعتبار إنك "منشنة" علية وناوية ترمي "هلب" و"تبرشتي" عليه علشان يخرجك معاه لأن كل شيء بالسيف إلا المحبة بالكيف، وبلاش شغل "حابس حابس على قلبك كابس".

حبي بابا حبي ماما:

بما إننا مش لاقيين حد نحبه ممكن ندي الحب ده لبابا أو لماما وندخل على ماما في عيد الحب واحنا راسمين هذه الابتسامة العريضة التي نرسمها لها في عيد الأم ونطلب منا 25 جنيه تمن الهدية اللي هنجيبها ليها بمناسبة عيد الحب، وطبعا ولا فيه هدية ولا حاجة، وهنرجع بالليل نقول ليها مش احنا هديتك اللي ربنا بعتها ليكِ ونرسم نفس الابتسامة إياها..

الحب والأنفلونزا:

من المزايا العديدة اللي نتميز بيها كبنات مش لاقيين حد ننزل معاه في عيد الحب، إننا لن نصاب بالأنفلونزا فالحب في الشتاء مضر بالصحة.. هذا ما أكدته هيئة الأرصاد الجوية، ولو كانوا اللي بيحبوا بعض دول بيحبوا بعض بجد كان كل واحد فيهم خاف على التاني وخلاه "يتلم" في بيته بدل الشحططة في الشوارع والكافيهات والغيظ في خلق الله اللي مش لاقيين وتلاقي البنت من دول يا حبة عين أمها واقفة وقربت تنشف من البرد، وسنانها متجمدة وعمالة تقول "للبأف" اللي واقف معاها "أنا نظرتك تدفيني.. أنا حاسّة بسخونة من حرارة الحب..".. خلّيهم بقى يتدفوا بحرارة الحب ويأفأفوا منها ونتدفى احنا بحرارة البطانية.

الأحمر:

إنتم عارفين ليه عيد الحب مرتبط باللون الأحمر؟ لأن اللون الأحمر مرتبط بالأحداث التي تتصف بالغليان كالثورة والحرية والشهادة ومع أن اللون الأحمر لون الدم فإن جميع المحبين يخلو منهم الدم لأنهم لم يراعوا الغلابة اللي زينا وأنا مش هادعي عليهم وقال على رأي المثل "عدوك بلاش تدعي عليه وسيب ربك يتصرف فيه".

أصحابك المقاطيع:

أكيد إنتم ليكم أصحاب برضه مش هيقضوا عيد الحب مع حد.. ممكن تتلموا كلكم على بعض وتعملوا قعدة حلوة أو تخرجوا في جولة "استفقادية"، بس بلاش ترزلوا فيها على خلق الله اللي لابسين أحمر وماسكين ورد وماشيين يحبوا بعض، وشايلين هدايا "اهئ اهئ اهئ اهئ.. أنا ماليش دعوة.. أنا عايزة هدية".. جتنا نيلة في حظنا الهباب.

في ملجأ الأيتام:

لازم في عيد الحب تحبوا حد بجد.. يعني إيه المشكلة لما نروح نقضي عيد الحب في ملجأ للأيتام على الأقل.. دول حد يستاهل إنكم تحبوه ومجرد الزيارة بتاعتك بالنسبة ليهم هتبسطهم ومش "هيقلبوك بقى ويقولوا ليك ورد وهدايا وكده" ويبقى منها ثواب بدل قعدتنا الهباب عمالين نتفرج على اللي رايح واللي جاي..

أهم حاجة إنك تقومي الصبح يوم عيد الحب وتبصي لشكلك التحفة في المراية.. " قمر طبعا وخصوصا وإنت قايمة من النوم"، وتقولي لنفسك: "كل سنة وأنا طيبة، وبكرة الشعب يعرف قيمتي". وتأكدي إن السنة اللي بعديها هتلاقي نفسك وسط ناس كتير.. كلهم لابسين أبيض في أبيض وحواليهم جناين وعمالين يلعبوا ويهزروا في حديقة "العباسية". (مستشفي المجانين)

ايه ده يا توتا

هههههههههههههههههههههههه

دنتى واقعه خااااااااااااالص هههههههههههههه

ربنا يحنن عليكى

ههههههههههههههههههههه

مشكورة جداااااااااا على الموضوع الذيذ ده

تسلم ايدك

ههههههههههههههههههههه

موضوع لذيذ ياتوتا

بس تعرفي اهم شئ في موضوعك ايه

ان لازم اي حد يحب نفسه

عشان يقدر يحب غيره

كمان لازم تكوني مقتنعة تماما بكل شئ جميل فيكي

عشان غيرك يقنع بيكي

لان الشغور بالثقة ينتقل للاخر من خلال نظرتك لنفسك

وثقتك بفسك

اشكرك يااحلى توتا على موضوعك اللي زي العسل

أمير الحب كتب:: ايه ده يا توتا

هههههههههههههههههههههههه

دنتى واقعه خااااااااااااالص هههههههههههههه

ربنا يحنن عليكى

ههههههههههههههههههههه

مشكورة جداااااااااا على الموضوع الذيذ ده

تسلم ايدك

شفت الى بيجرالى وبتضحك عليا كمان هو عشان انت يعنى بتحب اوشين تتريق عليا انا الغلبانة

بانـــــــــدة الإسكندرية كتب:: ههههههههههههههههههههه

موضوع لذيذ ياتوتا

بس تعرفي اهم شئ في موضوعك ايه

ان لازم اي حد يحب نفسه

عشان يقدر يحب غيره

كمان لازم تكوني مقتنعة تماما بكل شئ جميل فيكي

عشان غيرك يقنع بيكي

لان الشغور بالثقة ينتقل للاخر من خلال نظرتك لنفسك

وثقتك بفسك

اشكرك يااحلى توتا على موضوعك اللي زي العسل

مرسى ياقمر على مرورك الجميل طبعا انا واثقة فى نفسى عشان كدا العرسان ورايا ذى النمل

» الانسان قبل الحب شئ واثناء الحب كل شي وبعد الحب لاشئ!!!!!
» الحب.........وبكل الحب هنتكلم عن الحب
» وسائل التربية بالحب.. أو لغة الحب.. أو أبجديات الحب..
» هل الحب الثانى يمحى الحب الاول
» الحب الصامت اطهر انواع الحب