مصــــــــر بلــــــــــدى

مهما دورت ولفيت غيرك وطن مالقيت
ذكريات طفولتى فيكى وبالنسبالى إنتى البيت
إنتى الحب إنتى الطيبه فيكى إتربيت
إنتى جنسيه أمى أغلى من حبيت
فى الغربه بره ببقى تهت وأنتهيت
بندم وبسأل نفسى . طيب ليه أنا مشيت؟
لو كنت فيكى صبرت وكل جهدى حطيت
وفدتك باللى عندى ومن جوه قلبى اديت
وأغرس فى ولادى حبك أكتر منا حبيت
هتبقى أحلى جنه أأمن أمان بيه حسيت
مش ممكن أبدا مهما يكون هنرضى بغيرك إنتى بيت
هيقول حفيدى فى يوم بقبر جدى مريت
عزة النفس الهويه حب بلادى شميت
مش ممكن أبدا مهما يكون هنرضى بغيرك بيت
مهما دورت أنا ولفيت الدنيا شرق وغرب
مافى غيرك إنتى يا بلدى أبدا جوه القلب
لما بكون مسافر وأرجع ماسك طريق
بفتكر كل حاجه فيكى تصوير بطيـء
شارعك وأهل شارعى عاملين زى الفريق
محدش فيهم يقدر يفوت جاره لو فى ضيق
بيكون له أكتر من أخ وأصدق من الصديق
جوه كل حاره فيكى سلو وأصول
لو فى يوم إتنين إتخانقو ده يقول وده يقول
تلقى دايما في كبير بيترجعلو فى الحلول
بفتكر لما كنا عيال صغيرين ف الشارع
بنبنى الجول من طوب .. وبنهاجم وندافع
وبنخلص الماتشات ونروح و نشرب من الجامع
وقبل الدنيا ما تليل للغيه أكون طالع
أطير الحمام مع أصحابى ونتابع
ويحط الليل علينا وكله لبيته يكون راجع
أحلى جو ف العالم .. طول الأربع فصول
ليلك له أحلى سحر .. بدعى دايما إنه يطول
فيكى أقوى المواهب ..فيكى أذكى العقول
فيكى طاقه بشر جامدين بشكل مش معقول
خفة دم شعبك ده .. ف مدينه أو فى ريف
حول كل مشاكلو لنكت دمها خفيف
من زحمة الشوارع لحد حجم الرغيف
حتى ف عز الكوارث .. تعليق ظريف يضيف
جدعان طيبين .. وبقلب أبيض كبير
حتى المناسبه ف مصر بردو ليها طعم غير
رمضان أول عيدين إن كان صغير أو كبير
تلقى الناس ف الشوارع فرحانه وبتوزع خير
أحن قلوب ستات ف الدنيا ورجاله بتغير
لو منتخبنا جاب جول الشارع كله بيطير
قلى طيب أرضى إزاى أنا دلوقتى .. بوطن غير ؟؟؟؟؟؟؟؟
مهما دورت أنا ولفيت الدنيا شرق وغرب
مافى غيرك إنتى يا بلدى أبدا جوه القلب
انتى دائما فى القلب يا حبيبتى يا مصر
مما راق لى وأعجبنى
تحياتى
امين

ياااااااااااااااااااا
مبدع تسلم ايديك وقلمك

مصر دي ام الدنيا
اكيد اختيارك وما راق لك شئ رائع يااخي امين
اشكرك على اختيارك الجميل

مصر حبيبتي ام الدنيا
وكلنا بنعشق ترابها

مصــــــــر بلــــــــــدى 191pm